म. टा. विशेष प्रतिनिधी, नवी दिल्ली: आगामी लोकसभा निवडणुकीसाठी विरोधी पक्षांच्या आघाडीच्या चर्चा सुरू असताना सत्तारूढ भारतीय जनता पक्षाने (भाजप) उमेदवारांची पहिली यादी पक्की केल्याची निश्चित माहिती आहे. निवडणुकीच्या तारखा जाहीर होण्यापूर्वी म्हणजे याच महिना अखेरीस भाजपची किमान १०० ते १५० उमेदवारांची पहिली यादी जाहीर होण्याची चिन्हे असून त्यात पंतप्रधान नरेंद्र मोदी व गृहमंत्री अमित शहा यांच्यासह केंद्रीय मंत्री ज्योतिरादित्य शिंदे (ग्वाल्हेर), गजेंद्र शेखावत (जोधपूर), व्ही. मुरलीधरन (तिरुवनंतपुरम ग्रामीण) आदी हायप्रोफाइल नावांचा समावेश असू शकतो.
पंतप्रधान नरेंद्र मोदी यांच्या मुख्य उपस्थितीत भाजपच्या केंद्रीय निवडणूक समितीची पहिली बैठक येत्या गुरुवारी (२९ फेब्रुवारी) प्रस्तावित आहे व त्याच दिवशी रात्री भाजपची पहिली यादी जाहीर होऊ शकते, असे सूत्रांनी सांगितले. संघ परिवाराने गेली काही दशके अथक मशागत केलेल्या केरळमधून भाजपला यंदा आशा आहेत. पहिल्या यादीत केरळमधील किमान १० उमेदवार असू शकतात. भाजप प्रदेशाध्यक्ष के. सुरेंद्रन यांच्या नेतृत्वाखालील केरळ पदयात्रेत मंगळवारी (२७ फेब्रुवारी) पंतप्रधान नरेंद्र मोदीही सहभागी होऊ शकतात. त्यानंतर केरळचे चित्र आणखी स्पष्ट होईल.
पहिल्या यादीत तिरुवनंतपुरम, अटिंगल, कोल्लम, पठाणमथिट्टा, पलक्कड, एर्नाकुलम, त्रिशूर, मलप्पुरम, कोट्टायम, चालकुडी या मतदारसंघांतील उमेदवारांचा समावेश असण्याची चिन्हे आहेत. तिरुवनंतपुरम मतदारसंघात शशी थरूर यांना आव्हान देण्यासाठी केंद्रीय मंत्री राजीव चंद्रशेखर, अभिनेत्री शोभना आणि निर्माते-अभिनेते सुरेशकुमार यांची चर्चा आहे. केंद्रीय मंत्री व्ही. मुरलीधरन तिरुवनंतपुरम ग्रामीणमधून (अटिंगल) जोरदार प्रचार करत आहेत. त्रावणकोर राजघराण्यातील उमेदवारही भाजपच्या यादीत असतील, असे निश्चित सांगितले जाते.
शिंदे घराण्याचा गड असलेल्या मध्य प्रदेशातील ग्वाल्हेरचे राजकारणही या राजघराण्याभोवतीच फिरते. भाजपने येथे विजयाची हॅटट्रिक साधली आहे. मात्र, वर्तमान खासदार विवेक शेजवळकर यांच्याऐवजी आपल्यालाच तिकीट द्या, हा ज्योतिरादित्य शिंदे यांचा हट्ट भाजप नेतृत्व पुरवणार का, हा उत्सुकतेचा विषय आहे. भाजपने २००९मध्ये यशोधराराजे शिंदे, २०१४मध्ये नरेंद्रसिंह तोमर आणि २०१९मध्ये शेजवळकर यांना येथून निवडून आणले होते.
महाराष्ट्रात बड्या नेत्यांना धक्का?
भाजपने यंदा ३७० पार व एनडीएसाठी ४०० पारचा विडा उचलला असून पक्ष व सरकारचे सर्वेसर्वा नेतृत्व उमेदवारीबाबतही अनेक धक्के देण्याच्या तयारीत आहे. महाराष्ट्रातून काही बड्या चेहऱ्यांचीही नावे लोकसभेच्या यादीतून गायब राहण्याची दाट शक्यता आहे. यात काही केंद्रीय मंत्रीही असू शकतात. भाजप नेतृत्व सोयीचे ठरेल तेव्हा ७५ वर्षांपुढे तिकीट नाही, एकाच घरात एकच लोकप्रतीनिधी आदी निकष लावत असल्याचे याआधीही कर्नाटक, पंजाब आदी राज्यांबाबत दिसून आले आहे.
नुपूर उप्पल यांच्याविषयी
नुपूर उप्पल
नुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… Read More
>>> Read full article>>>
Copyright for syndicated content belongs to the linked Source : The Times of India – https://marathi.indiatimes.com/india-news/bjp-will-annouce-the-first-list-of-candidates-for-lok-sabha-2024-end-of-the-month/articleshow/107976971.cms